Preséntase’l llunes 6 de mayu a les 19:30 hores en La Pola Siero
Coincidiendo cola Selmana de les Lletres Asturianes la editorial La Semeya asoleyó’l llibruTrés pates pa un tayuelu de los autores Nacho Fonseca, Sidoro Villa Cosatales y Daniel García Granda. L’Auditoriu de Siero de La Pola acueye la presentación esti llunes 6 de mayu a les 19:30 hores.
En Trés pates pa un tayuelu Nacho Fonseca, Sidoro Villa Cosatales y Daniel García Granda ufren una esbilla d’artículos d’opinión que foron publicando nel diariu EL COMERCIO, na seición de Siero y Centro, mientres la primer y segunda década d’esti sieglu. Con veinticinco artículos en cada pata esti tayuelu nun pue faltar en dengún llar. Una oportunidá pa esfrutar de la pluma d’estos trés autores contrastaos na so versión más periodística y con temátiques variaes que si bien tan escrites dende Siero sobrepasen l’ambitu local.
En pallabres del prologuista, Faustino Álvarez, en Enriba la muria Sidoro Villa da la so siempre orixinal visión de les coses d’andar per casa y pel mundo alantre. Los avisos de Daniel García Granda en Que te vengo a ver, lleguen con humor, frescura y llargor de mires dende la so atalaya o talambera bimeniega, polesa o universal. Y cola Ropa tendío de Nacho Fonseca ye mester andar con tientu na llectura, talantar y maliciar no que nun se diz, sonrises y coña, repartía a pares pa los de casa y pa los de fuera.
Los autores son bien conocíos nel mundu editorial asturianu y tienen munches obres editaes n’editoriales del Gremiu d’Editores d’Asturies como Trabe, Impronta o Pintar Pintar.
Nacho Fonseca Alonso (La Pola Siero, 1951) ye profesor de primaria xubiláu y creó’l coru infantil Xentiquina. Amás del so llabor como músicu y lletrista, foi autor de llibros de textu d’asturianu y tien publicaes delles obres infantiles como Blimes, Cantares d’Asturies o La Tortilla de Doña Pita. Acaba de publicar cola editorial La Fabriquina el llibru-CD “Canciones pa la Xentiquina”. Ye académicu correspondiente de la Academia de la Llingua Asturiana y foi nomáu Fíu predilectu del Conceyu Siero.
Sidoro Villa Costales (Lieres, 1962), ye profesor de primaria, ilustrador y escritor. Tien publicaes les noveles A estaya (2016) –que xustamente esti mes acaba de reeditar Impronta–, Tres beyuscos (2019), El fervinchu cola que ganó el XLI Premiu Xosefa Xovellanos de novela en 2020 y Pielgos de Llercia (2021). Amás, escribió dellos llibros de lliteratura infantil y xuvenil como Llibru de los suaños (2007), ¡Nun-yos tengas perceguera!‘ (2004), Mael al debalu (2010), Evaristo Valle, el pintor del antroxu (2011) o Nun-yos tengas perceguera 2 (2016).
Daniel García Granda (La Pola Siero, 1972) ye profesor de secundaria y escritor n’asturianu y castellanu. Tien publicaos los poemarios Poemes del últimu salvaxe (2012), El Remediu (2015), El raitán y el sangrín (2020) y Rosada 3.0. Monólogu interior con alumnos al fondu col que ganó’l Premiu Teodoro Cuesta 2021. Tamién ye autor de les obres infantiles Versos d’Asturies (2017), Amorina Motosierra (2018) y Prau (2021) editaos pola editorial Pintar Pintar. Amás, ye’l traductor al asturianu d’obres como El saber del país de John Berger o en En llucha incierta de John Steinbeck.
Editores de Asturias / Editores d'Asturies 