Novedá editorial: «La vida esplicada» de La Semeya Editorial

La vida nun tien argumentu, y ante esa incontestable verdá, l’autor Xosé I. Pidal Montes adiéntrase nel territoriu de la narrativa a traviés del invisible filu conductor de lo oyío, de lo lleío, de lo vivió; de l’acordanza de tantos nomes qu’hasta la memoria escaeció. Siempre buscando que quien llea esta vida esplicada caleye pela sienda que s’abre ente la niebla de la lleenda y la realidá. Como daquién dixo: Lo bueno que tien esti llibru ye que abras pela páxina que lu abras, siempre te cuenta una hestoria. Y lo meyor que tienen algunes hestories, ye que son l’ecu de los gritos de los que desapaecen y que puen tardar munchu tiempu en llegar hasta equí; pero que al final, siempre acaben llegando.

Xosé I. Pidal Montes (Bimenes, 1970). Tien publicaos tres poemarios “Nadie se Salva”(Versos & Reversos), «Ensin bones referencies”(Suburbia) y «Parabellum en flor»(Best Books). Con «La vida esplicada» debuta nel xéneru de la narrativa, una obra rompedora na que’l so argumentu ye la propia novela.