NOVEDÁ: «Cantar de mi mesmu» / Delallama Editorial

Cantar de mi mesmu de Walt Whitman / Traducción de Milio Ureta.

Walt Whitman foi’l poeta de la llibertá y la inclusión: el poeta de les minoríes, y de les muyeres, y el de los desheredaos. Foi’l primer bardu modernu d’América y el cantor de la so democracia recién parida. Panteísta, xabaz y pansexual, místicu y llibertín, Whitman cultivó tamién l’autosuficiencia del trescendentalismu emersonianu, y foi capaz de crear con too ello un canon poéticu y lliterariu optimista, vital ya inéditu, pa la so nación de munches naciones (la que, de siguío, diba ser llamada a dominar el mundu).

La lletra impreso nes páxines d’esti Cantar de mi mesmu ye la del país del gris oceánicu y los cazadores de ballenes; ye la lletra de la democracia moderna a les puertes d’una guerra, la de los llabriegos y el trigu, la de los algodonales; ye la lletra de les ciudaes nacientes, y les mines, y los tramperos; la de la tierra sagráo de los indios invadíos; la lletra de los güeyos ensin fondu de los gües, la del deséu calláu de les muyeres, y la de los esclavos y los homes llibres; ye la lletra de los colonos y les races; la lletra de los Creos y los sentíos; la de los cuerpos y les ánimes.

Ye la lletra de ti mesmu. Y la de ti mesma.

La prestosíasim traducción d’esti Cantar… fírmala Milio Ureta, y vien escrita n’asturianu centroriental. L’escritor ribeseyanu fainos el regalu de la más alta lliteratura americana, envuelta en papel de periódicu y papel de cera; vistida en pañu y en tela vichy. Y la llingua asturiana —con esti Whitman— ta en tiempu de festexar.

Tu que yá lo ties too lleío y entendío de Walt Whitman; o que quiciabes nun yeres a allugalu más allá d’El Club de los Poetes Muertos, o’l desenllaz lliterariu de la cocina de metanfetamines deBreaking Bad…atiendi si almites conseyu, y da-y oportunidá a estiCantar de mi mesmu que ties nes manes. Eso sí, tate al quite: vas nortiar más pelo bravo que pelo sabío, y sicasí, vas alcontrate nes fueyes…

Llueu nos cuentes.