Zoo ye un llibru míticu de Bruno Munari, asoleyáu orixinalmente n’inglés (Nueva York, 1963) que nun se publicara n’italiano hasta 1972. Tampoco nunca nun s’asoleyara hasta agora n’España. El llibru ye una maraviya formal, un prodixu visual y conceptual, abiertu a milenta llectures, interpretaciones y ensoñaciones sobre’l mundu de los animales, los sos vezos, les sos figures, colores, pelo, plumaxe, nomes…
Too nesti llibru preciosu ta pensao, baxo la premisa del menos ye más, pa espertar sensaciones y aguiyar la creatividá ente los llectores más nuevos. Perindicáu pa les primeres edaes, con ilustraciones hipnótiques, les pallabres precises y mui amañosu pa interpretaciones imaxinatives, a comuña ente mayores y pequeños, ente escolinos y educadores, ideal pal aniciu na llectura nel rodiu familiar y escolar, y convida a entamar xuegos llingüísticos y actividaes plástiques a esgaya.
Bruno Munari (1907-1998), autor y ilustrador d’esti llibru, fue ún de los grandes nomes del diseñu gráficu, industrial y editorial del sieglu XX. Nel so maxín medró un bayurosu llaboratoriu creativu del que xurdieron tamién llibros pa la reciella nos que’l xuegu, lo didáctico, la invención y la llibertá imaxinativa diben siempre de la mano pa discurrir histories maravioses.
https://improntaeditorial.com/libros/zoo/
Editores de Asturias / Editores d'Asturies 