Nun tiempu nel que les pantalles ofrecen respuestes instantánees y la imaxinación paez domada, hai llibros que conviden a parase, a mirar con atención y a dexar xugar la mente. Adivina adivinanza… y cuntóme un secretu, escritu por Montserrat Garnacho y ilustráu por Laura Varela, ye ún d’esos llibros. Espublizáu pola editorial asturiana Pintar-Pintar, en llingua asturiana —versión orixinal— y depués en castellán, preséntase como un álbum ilustráu que rescata y anueva un xéneru ancestral: la adivinanza.
RESUME: Un llibru pa xugar, imaxinar y adivinar, con escenes ilustraes enllenes de pistes, sorpreses y secretos. Una esbilla de cosadielles populares, poétiques y divertíes que percuerren les actividaes y momentos del día: na escuela, d’escursión, na plaza, na oriella de la mar… ¿Atréveste a intentar acertales? Ideal pa trabayar la oralidá, el pensamientu llateral, la comprensión llectora y la creatividá en neñes y neños de seis años p’arriba. Edición ilustrada y cuidosa que revaloriza les adivinances como tresoru lliterariu y cultural, favoreciendo igual la llectura autónoma que la compartida.
Editores de Asturias / Editores d'Asturies 