El poemariu infantil «Versos d’Asturies», escritu por Daniel García Granda y ilustráu por Ilemi Cuesta Mier, torna a les llibreríes con una tercer edición en llingua asturiana. Un regresu afayadizu que confirma la bona acoyida d’esta obra ente los llectores, asina como l’interés creciente pola lliteratura infantil n’asturianu.
Dende la so primer edición, asoleyada en 2017, «Versos d’Asturies» llevó a cientos de neños y neñes a descubrir 23 llugares del nuesu territoriu pel mediu de poemes que saben a quesu, güelen a mar y resonen col ritmu del haiku o la vaqueirada. Cada poema ye una postal lliteraria que atrapa la esencia d’Asturies, acompangáu polos colores vivos y certeros d’Ilemi Cuesta, que supo recoyer la riqueza del paisaxe y la cultura asturiana d’una manera cercana y veraz.
Daniel García Granda, que s’estrenó na lliteratura infantil con esti títulu, reflexa nel so trabayu la conexón natural ente la poética y la musicalidá del asturianu. «La poesía, como la música, ye un xuegu de ritmos y cadencies, y na infancia depréndese d’una manera natural», señala l’autor, que recuerda como los primeros poemes nacieron como un entretenimientu compartíu cola so fía. Dende entós, «Versos d’Asturies» nun dexó de medrar, convirtiéndose nun referente na lliteratura infantil n’asturianu.
La segunda edición del llibru escosóse va poco más d’un añu, lo que dexa ver la so relevancia y el so valor pa families, escueles y biblioteques. La llegada d’esta tercer edición nun ye namás un “trunfu” personal pa Daniel y Ilemi, sinón tamién un llogru importante pa la editorial Pintar-Pintar y pa toles persones qu’apuesten pola creación lliteraria n’asturianu. «Ver qu’un llibru infantil n’asturianu llega a una tercer edición ye un motivu d’allegría y d’esperanza», afirma l’autor.
Mientres estos años, «Versos d’Asturies» siguió presente en colexos, feries y actividaes didáctiques, onde sigue despertando el gustu pola poesía y pol asturianu ente les xeneraciones más mozas. Esta tercer edición garantiza que nuevos llectores puedan siguir descubriendo esti paisaxe líricu que forma parte del nuesu patrimoniu cultural.
Y, como novedá, anunciámosvos que nel cursu 2025-2026 verá la lluz «Versos d’Asturies II», con nuevos poemes pa los sitios que quedaron ensin el so propiu cantar. De nueves, la poesía y la ilustración van siguir amosándonos l’alma d’Asturies, en pallabres y colores.
- Galería de fotos
- Primeres páxines
- Dosier de prensa .pdf
- Propuesta d’actividaes
- Edición en castellán
- Distribuye: Asturlibros
Editores de Asturias / Editores d'Asturies 